Чăваш патшалăх çамрăксен театрĕ Коми Республикинче пурăнакан чăвашсем патĕнче пулнă. Унта пирĕн артистсем «Маръямоль» Пĕтĕм тĕнчери театр фестивальне хутшăннă. Театр форумĕнчен вĕсем дипломпа таврăннă.
Ака уйăхĕн 16-мĕшĕнче "Киров-Советск" автоçул çинче пĕчĕк автобус инкеке лекнĕ. Авари Киров хулинчен 16 километрта ирхи 3 сехет иртсен пулнă. Аманнисен шутĕнче Чăваш Енре пурăнакансем те пур. Инкекре Çĕнĕ Шупашкарта пурăннă 58 çулти арçын вилнĕ.
Елчĕк районĕнчи "Комбайн" ял хуçалăх кооперативĕнче çуртрисене акма тухнă. Чăваш Енĕн Ял хуçалăх министерстви паян хыпарланă тăрăх, пĕр çул ÿсекен курăксене унта хальлĕхе 13 гектар акнă.
Ака уйăхĕн 14-19-мĕшĕсенче Шупашкарти И. Солдатова ячĕллĕ спорт шкулĕнче сĕтелçи теннисла выляссипе ăмăрту иртет. Унта 16 çулчченхи кадетсем выляççĕ. Атăлçи округĕнчи 14 регионтан спорт ăмăртăвне 112 арçын ачапа 93 хĕрача килсе çитнĕ. Пирĕн республикăри хĕрсемпе каччăсем те спорт тупăшăвне самаййăн хутшăнаççĕ: йышра - 42 çамрăк спорстмен.
Ĕнер, ака уйăхĕн 13-мĕшĕнче, Чăваш Енре "Ку вăл тĕлĕнтермĕш" ыр кăмăллăх фончĕ йывăр чирлĕ ачасене пулăшма аукцион йĕркеленĕ. Унта республикăри предприяти-организаци ертÿçисем, ĕçлĕ ушкăн представителĕсем пуçтарăннă. ЧР Ачасен прависем енĕпе ĕçлекен уполномоченнăй Елена Сапаркина та унта хутшăннă, йывăр чирлисене пулăшма килĕшнĕ уçă кăмăллă çынсене тав тунă.
"Сыхланакана Турă сыхлать", - теççĕ ваттисем. Ку каларăш чăнлăхне çÿлти хăвата ĕненекенсем çеç мар, ахаль çынсем те ăша хываççĕ. Хăрушсăрлăх пирки ĕнер Чăваш Ен Пуçлăхĕ Михаил Игнатьев Мăнкун уявĕ вăхăтĕнче халăха хăрушсăрлăхпа тивĕçтересcипе çыхăннă ыйтупа канашлура калаçнă.
Паян Чăваш патшалăх гуманитари ăслăлăхĕсен институтĕнче "Пĕтĕм чăваш диктанчĕ - 2017" акцин йĕркелÿ комитечĕн ларăвĕ иртрĕ. Унта диктант текстне палăртрĕç. Кăçалхи тĕрĕслеве хутшăнакансем Геннадий Волков этнопедагогăн хайлавĕсенчен пĕрне (ячĕ хальлĕхе вăрттăнлăх пултăр) суйларĕç. Сăмах май, гуманитари ăслăлăхĕсен институчĕн ертсе пыракан ăслăлăх ĕçтешĕ Геннадий Дегтярев тепĕр текст та - Андриян Николаев космонавт хăйĕн хĕрне, Аленăна, пиллесе каланине - сĕнчĕ. Анчах пунктуаципе орфографи тĕлĕшĕнчен ансат тесе ăна илес темерĕç.
Паян Чăваш наци радиовĕн "Ирхи кăмăл" передачин тÿрĕ эфирĕнче "Хыпар" Издательство çурчĕн "Тантăш" хаçат, "Тетте", "Самант" журналсен редакторĕ Алина Изман пулнă. Аса илтерер: çĕнĕ тивĕçе вăл нумаях пулмасть кÿлĕнчĕ. Кăларăма Мария Самделова тата Владислав Московцев ертсе пынă.
Ĕнер Чăваш Енĕн Общество палатинче митингсемпе халăх йышлă пуçтарăнакан ытти акцие ирттерсе ята кĕрес мар тесен мĕн тумаллине сÿтсе явнă. Унта халăх институчĕн тĕрлĕ представителĕ, йĕрке хуралçисем, ĕç тăвакан тата саккун кăларакан органсенче ĕçлекенсем, прокуратура çыннисем пуçтарăннă.
Чăвашла верси
Русская версия
