Паян ирпе, çурçĕр иртсен, Шупашкарти гидроэлектростанцире ваннине пула Улатăр, Пăрачкав, Канаш, Шăмăршă, Патăрьел тата Комсомольски районĕсенчи 224 ял çутăсăр юлнă. Çутта çавăн пекех Тутарстанри 7 районта сÿнтернĕ.
Чăваш Енĕн Транспорт министерстви кÿмепе çÿрекенсене турттарма икĕ автобус туянасшăн. Ун валли ведомство 13,18 миллион тенкĕ уйăрĕ.
Авăн уйăхĕн 4–6-мĕшĕсенче Мордва Республикинче машинăпа ĕне сăвакан операторсен Пĕтĕм Раççейри конкурсĕ иртрĕ.
Çеçпĕл Мишши ячĕллĕ Чăваш патшалăх çамрăксен театрĕ чăвашла пĕлекен 15-20 çулсенчи яш-кĕрĕмпе хĕр-упраçа театр студине йышăнать. Унта лекес тесен кастинг витĕр тухмалла. Тĕрĕслеве пыракансен юптарусем, вырăс тата чăваш авторĕсен сăввисене, проза произведенийĕсене, ташăпа юрă хатĕрлемелле.
«НТВ» телеканалпа пыракан «Эсĕ супер! Ташă» проекта Шупашкарта пурăнакан 15 çулти Елизавета Ащеулова хутшăнать.
Çак кунсенче, авăн уйăхĕн 4-6-мĕшĕсенче, Мордва Республикинче машинăпа ĕне сăвакан операторсен Пĕтĕм Раççейри конкурсĕ иртет. Кăçалхипе 26-мĕш хут йĕркеленĕ ăмăртăва пирĕн республикăри доярка та хутшăнать. Чăваш Ен чысне хÿтĕлеме республикăри конкурсра çĕнтернĕ Тăвай районĕнчи «Акконд-агро» операторĕ Екатерина Георгиева тивĕçнĕ.
Авăн уйăхĕн 9-мĕшĕнче Шупашкарти «Энергия» стадионта «Советская Чувашия» хаçат парнисене çĕнсе илессишĕн çăмăл атлетсем çулсерен иртекен йăлана кĕнĕ эстафетăна пухăнĕç. «Хыпар» издательство çурчĕн ĕçченĕсем те унта хутшăнма палăртнă. Ушкăна кĕнĕ маттурсем халĕ çине тăрсах ăмăртăва хатĕрленеççĕ.
Шуршăлти А.Г.Николаев космонавт летчикăн Мемориал комплексĕнче паян халăх нихçанхинчен те ытларах пулчĕ. Çурла уйăхĕн 5-мĕшĕнче Совет Союзĕн икĕ хут Геройĕ, СССР космонавт летчикĕ, Чăваш Республикин хисеплĕ гражданинĕ Андриян Григорьевич Николаев çуралнăранпа 88 çул çитрĕ. Паллă кун ячĕпе Мемориал комплексĕнче савăнăçлă митинг иртĕ, унта Чăваш Республикин Пуçлăхĕ Михаил Игнатьев та хутшăнчĕ.
Паян Чăваш Ен Пуçлăхĕ Михаил Игнатьев ĕç тăвакан влаç органĕсен тата муниципалитетсен ертÿçисемпе ирттернĕ канашлура ЧР Пуçлăхĕ Çĕнĕ Шупашкарти ЖКХри МУПпа çыхăннă ĕç-пуçпа кăсăкланчĕ. Ăшă энергийĕпе тивĕçтерекен организаци 80 миллион тенкĕлĕх парăма пула суда тавăçпа тухнă май çак управляющи организаци çÿп-çапа илсе тухайман иккен. Шупашкарти "Коммуналлă технологисем" ООО тĕлĕшпе те ÿпкев пулчĕ — газшăн çак компани 1 миллиард тенкĕ ытла тÿлемен.
Республика Пуçлăхĕ Михаил Игнатьев ĕç тăвакан влаç органĕсен тата муниципалитетсен ертÿçисемпе тунтикунсерен ирттерекен планеркăра вице-премьер — ял хуçалăх министрĕ Сергей Артамонов ĕççи кăтартăвĕсемпе паллаштарчĕ.
Чăвашла верси
Русская версия
