Патшалăх служащийĕн сумĕ пысăк

Раштав уйăхĕн 23-мĕшĕнче «Чăваш Республикин чи лайăх патшалăх граждан служащийĕ» тата «Чăваш Республикинчи муниципалитетăн чи лайăх граждан служащийĕ» конкурссене пĕтĕмлетнĕ. Унта республикăри патшалăх влаçĕн органĕсен ертÿçисем, конкурссен йĕркелÿ комитечĕсен членĕсем, кадр службисен сотрудникĕсем хутшăннă.

Чăваш Ен Пуçлăхĕн Администрацийĕн Ертÿçи Юрий Васильев конкурса хутшăннисен шайĕ пысăк пулнине палăртнă. «Конкурса эпир 2011 çултанпа ирттеретпĕр, - тенĕ Юрий Егорович. - Унăн тĕллевĕ - патшалăх служащийĕн сумне ÿстересси. Конкурса хутшăннисем пурте - пуçаруллă, хастар, малашлăх тĕллевлĕ тата вĕсем çĕнĕлле шухăшлаççĕ тата ĕçлеççĕ».

Чăваш Ен финанс министрĕ, конкурссен йĕркелÿ комитечĕсен председателĕн заместителĕ Светлана Енилина та кăçалхи конкурс çÿллĕ шайра иртнине палăртнă: «Эсир пурте - çĕнтерÿçĕсем. Ĕçтешĕрсен хушшинче хăвăра пур енчен лайăххипе кăна кăтартрăр.

«Чăваш Республикин чи лайăх патшалăх граждан служащийĕ» конкурсра Чăваш Енĕн Финанс министерствин йĕркелÿ пайĕн тĕп эксперт-специалисчĕ Александра Соболева çĕнтернĕ. Унăн «Халăхăн финанс пĕлĕвне ÿстересси» проектне «Чи лайăххи» тесе палăртнă. Патшалăх службинче А.Соболева виçĕ çул тăрăшать.

Чăваш Республикин юстици министрĕ Надежда Прокопьева, «Чăваш Республикинчи муниципалитетăн чи лайăх граждан служащийĕ» конкурсăн йĕркелÿ комитечĕн председателĕ, асăннă тупăшу икĕ тапхăрпа, виçĕ номинаципе иртнине пĕлтернĕ.

Кунта «Муниципалитет вĕрентĕвĕнчи чи лайăх çамрăк специалист» номинаци кĕртнĕ. Конкурса хутшăннисен йышĕ ÿссех, тытăмри кадрсем улшăнса тăрасси 2012 çултанпа чакса пырать. Çакăнта асăннă конкурсăн витĕмĕ те пысăк.

Муниципалитет служащийĕсен конкурсĕнче виçĕ номинацире пĕрремĕш вырăнсене Шупашкар районĕнчи Янăш ял тăрăхĕн администрацийĕн пуçлăхĕн заместителĕ Ольга Смирнова, Елчĕк район администрацийĕн ĕçсен управляющийĕ Евгения Михайлова тата Канаш район администрацийĕн тĕп эксперт-специалисчĕ Елена Леонтьева йышăннă.