Кĕркунне иммунитета çирĕплетмелле
Общество транспортĕнче ялан халăх нумай. Вĕсен хушшинче ÿсĕрекен те, сунаслакан та пур. Нумайăшĕ çăвара хупламалли çинчен те манать. Çÿрет вара салон тăрăх инфекци. Пĕрне, теприне çыпăçать. Çапла сарăлать те чир-чĕр. Кайран тăрук аптăраса ÿкнĕрен тĕлĕнетпĕр. Кам айăплă çакăншăн? Паллах, хамăрах. Чирлĕ çыннăн халăх хушшине тухмалла мар. Унăн тухтăртан пулăшу ыйтмалла, килте е больницăра сипленмелле. Çакна кашниех пĕлет-ăнланать. Анчах ансат çак йĕркене чылайăшĕ пăхăнасшăн мар. Чире ура çинчех ирттерсе ярасшăн. Ку сывлăхшăн сиенлĕ пулнине шута илместпĕр.