Комментари хушас

Чӳк уйăхĕн 23-мĕшĕ тĕлне республикăна пĕтĕмпе 611594 вакцина килнĕ. Ку вăл планпа пăхнин 80,5 проценчĕ. Палăртнă тăрăх, Чăваш Енри халăхăн /аслă ӳсĕмрисене/ 80,5 процентне /760210 çынна/ прививка тутармалла. ЧР сывлăх сыхлавĕн министрĕн пĕрремĕш çумĕн тивĕçĕсене пурнăçлаканĕ Алексей Кизилов пĕлтернĕ тăрăх, паянхи кун Чăваш Енри медицина учрежденийĕсенче Гам-Ковид-Вак /Спутник V/ , «СпутникЛайт», ЭпиВакКорона, КовиВак вакцинăсем çителĕклĕ.

Алексей Владимирович вĕсен хисепĕ 123 пин дозăран иртнине пĕлтерчĕ. Çак хисеп ĕçе чарса тăратмасăр, кал-кал йĕркелеме çитет. «Чӳк уйăхĕн 22-мĕшĕнче республикăна «СпутникЛайт» тепĕр парти /17400 доза/ килчĕ. Ăна Шупашкарти тата Çĕнĕ Шупашкарти сиплев учрежденийĕсене çитернĕ ĕнтĕ. Паян вакцина республикăри район больницисенче те пулĕ. Çитес вăхăтрах ЭпиВакКорона — 9000, КовиВак 5000 доза килмелле. Çавăн пекех Гам-Ковид-Вак та çителĕклех килсе тăрать. Ятарлă специалистсем çавăн пекех сăмсаран яракан вакцинăна та тĕрĕслеççĕ. Манăн шухăшпа, унпа тепĕр 2-3 уйăхран усă курма ирĕк параççĕ. Палăртмалла: медицина учрежденийĕсенче прививка тутарас текенсен черечĕсем çук. Вакцинаци пункчĕсем ирхи саккăртан пуçласа каçхи саккăрчченех ĕçлеççĕ. Шăматкунпа вырсарникун та укол тутарас текенсене саккăртан пуçласа вун тăватă сехетчен йышăнаççĕ. Çавăн пекех шурă халатлисенчен йĕркеленĕ мобильлĕ бригадăсем предприятисемпе учрежденисене çитеççĕ, ялсене тухса çӳреççĕ. Коронавируспа чирлесе ирттернисем, антителăсем йышлă çынсем те кюаркод илесшĕн. Çак енĕпе республика Пуçлăхĕ патне, Сывлăх сыхлавĕн министерствине, медицина учрежденийĕсене нумай ыйту килнĕ. Çак енĕпе эпир ĕç планне хатĕрлерĕмĕр. Республикăри клиника больницин тата республикăри ӳт-тирпе венерологи чирĕсен диспансерĕнчи лабораторисем пациентсен юнри антителăсен шайне тĕрĕслĕç. Пациентсен хатĕр анализĕсемпе вырăнти больницăра тухтăрсен комиссийĕ витĕр тухмалла. Антителăсем нумай тăк ковидран прививка тутармасан та пултараççĕ», - палăртрĕ Алексей Кизилов.

Маларах «СпутникЛайтпа» вакцинациленнисем «Патшалăх пулăшăвĕсем» порталта виçĕ кунранах сертификат илме пултарнă. Ун чухне ковидран пуçласа укол тутарас текенсем те суйлама пултарнă ăна. Халĕ вара унпа ытларах ревакцинацилеççĕ. «Пĕр компонентлă «СпутникЛайтпа» прививка тутарсан специалистсем çирĕплетнĕ тăрăх, иммун хуравĕ 21 кунтан çеç пулать. Çавăнпа кюаркода «Патшалăх пулăшăвĕсем» порталта 21 кунран çеç илме пулать», - пĕтĕмлетрĕ Алексей Кизилов.

www.hypar.ru