Парадпа, анчах салютсăр
Çу уйăхĕнчи уявсене мĕнлерех паллă тăвăпăр-ши? Кун пирки культура министрĕ Светлана Каликова тунтикунсерен ирттерекен канашлура паллаштарчĕ.
Чăн та, хальлĕхе чылай мероприяти шăпи уçăмсăр-ха — пандеми хăрушлăхне кура Роспотребнадзор мĕн каласса кĕтмелле. Калăпăр, йăлана кĕнĕ «Вилĕмсĕр полк». Культура министерстви онлайн майпа йĕркелеме сĕнет — ыйтăва кăшт каярах татса парĕç. Çуркуннепе ĕç уявĕнчи халăх йышлă хутшăнакан митинг-демонстраци пулмĕ. Çĕнтерӳ кунĕнчи пĕрлехи полк парадне вара ирттереççех. Вăрçă ветеранĕсене парнесемпе савăнтарасси те — иккĕленӳсĕр.
Уявсем пирки каланă май Олег Николаев коронавирус инфекцийĕн хăрушлăхĕ сирĕлменнине аса илтерчĕ — юлашки кунсенче чир ернисен шучĕ кăшт пысăкланни те сисĕнет. Çак условисенче, паллах, хăрушлăх çине алă сулса халăх йышлă пухăнакан мероприятисем йĕркелени вырăнсăр. Апла тăк уяв концерчĕ те, салют та пулмĕç.