Çĕнĕ 2016 çул тата çутă Раштав уявĕ ячĕпе саламлатпăр!

Хаклă ентешĕмсем!

Сире Çĕнĕ 2016 çул тата çутă Раштав уявĕ ячĕпе пĕтĕм чунтан саламлатăп!

Вĕçленекен çулталăк ансат мар, çапах питĕ интереслĕ, тĕрлĕ пулăмпа пуян пулчĕ.

14 çуллăх тăхтав хыççăн Чăваш Енре пирвайхи хут республика Пуçлăхĕн пĕтĕм халăх суйлавĕ пулчĕ. Вăл уçă та тĕрĕс иртрĕ. Эпĕ мана шаннисене пурне те чĕререн тав тăватăп.

Пирĕн ума тухса тăнă йывăрлăхсем пире ăслăрах, вăйлăрах тата çирĕпрех пулма пулăшрĕç, республикăна аталантарас енĕпе çĕнĕ хăват пачĕç. Эпир ăнасса никамах та шанман проектсене пурнăçлама пултартăмăр. Çĕр фельдшерпа акушер пункчĕн строительствин пысăк та пĕлтерĕшлĕ программине вĕçлерĕмĕр. Республикăра ача сачĕллĕ тата стадионлă çĕнĕ микрорайонсем çĕкленчĕç, çĕнĕ производствăсем уçрăмăр, пысăк технологиллĕ ĕç вырăнĕсем йĕркелерĕмĕр.

Пурнăçланă ĕçе кура нумай çул пурăнакансен шучĕ - 18, нумай ачаллă çемьесен йышĕ 25: ÿсрĕ, пурнăç тăршшĕ 2,5 çул хушăнчĕ.

Пирĕн ăнăçусене чи çÿллĕ шайра пĕрре кăна мар палăртнă. Чăваш Республики Раççейĕн инновацисене вăйлă аталантаракан пилĕк регионĕн йышне кĕчĕ. Инвестици климачĕн наци рейтингĕнче Чăваш Ен регионсен хушшинчи бизнес валли хăтлă условисем йĕркеленĕ лидерсен малти теçеткинче.

Пирĕн республика Раççей Федерацийĕн Президенчĕ çумĕнчи Ача прависемпе ĕçлекен уполномоченнăй рейтингĕнче ачасен пурнăçĕ тĕлĕшпе чи ырă 10 регион шутне тăнă.

2015 çулта Чăваш Ен çĕршывăн спорт центрĕн статусне çирĕплетрĕ. Эпир чăваш çĕрĕ çинче ирттернĕ Европăри командăсен чемпионатне çăмăл атлетсен Раççейри 2015 çулхи чи лайăх спорт пулăмĕ тесе хакланă.

Хаклă туссем! Экономикăшăн ансат мар вăхăтра та эпир инновацие тĕпе хуракан производствăсем уçатпăр, пурăнмалли çурт-йĕр, больницăсемпе поликлиникăсем, клубсем, шкулсемпе ача сачĕсем çĕклетпĕр. Пĕрле эпир курăмлă çитĕнÿсем тума пултарасси пирки иккĕленместĕп! Пирĕн пĕрлĕх - пархатарлă та хăватлă вăй!

2016 çула Чăваш Енре Ĕç çыннин çулталăкĕ тесе пĕлтернĕ. Пирĕн тĕллев - пурне те, чи малтанах çитĕнекен ăрăва çитĕнÿсене тата хисепе тÿрĕ кăмăллă ĕçпе çеç çĕнсе илме май пуррине ăнлантарасси!

Çĕнĕ çулта пурне те ăнăçу, çирĕп сывлăх тата телей сунатăп! Пурне те - уяв ячĕпе! Çĕнĕ 2016 çул ячĕпе!

Чăваш Республикин Пуçлăхĕ Михаил ИГНАТЬЕВ.

***

Хаклă ентешсем!

Сире çывхарса килекен 2016 çул ячĕпе саламлатăп!

Авалтанпах Çĕнĕ çул уявĕ кашни çыншăн - малашлăхăн уçă алăкĕ пек. Çутă ĕмĕтсем пурнăçа кĕрессипе çыхăннă шанăç çак кунсенче çĕкленÿллĕ кăмăл кÿрет, хăюллă плансем палăртма май парать.

Истори черетлĕ çаврăм турĕ. Вĕçленекен çулталăка ăсатнă май эпир ырă кăмăл-туйăмпа тата паллă пулăмсемпе пуян малашлăх пуласса шанатпăр. Ыранхи кун ырă хыпарсем кÿтĕр тесе килĕштерсе, пĕр-пĕрне хисеплесе тата пулăшса пурăнмалла - Чăваш Енре тĕрлĕ халăх, тĕн, культура çыннисем авалтанпах çапла пурăннă.

Сире, хаклă ентешĕмсем, сывлăх, çĕкленÿллĕ кăмăл-туйăм, палăртнă тĕллевсене ăнăçлă пурнăçлама, савăнăç, ырлăх, телей тата юрату сунатăп!

Федераци Канашĕн Председателĕн пĕрремĕш заместителĕ

Николай ФЕДОРОВ.

***

Чăваш Енĕн хисеплĕ çыннисем!

Сире тата çывăх çыннăрсене Çĕнĕ çулпа тата Раштавпа саламлатăп! Килекен çулталăк Сирĕншĕн ăнăçлă та тухăçлă, çĕнĕ майсемпе çитĕнÿсен çулĕ пултăр. Сире ырлăх, тăнăçлăх, иксĕлми вăй-хăват, çутă ĕмĕтĕрсене пурнăçлама сунатăп. Палăртнă тĕллевĕрсем тÿрре тухчăр.

Раççей Президенчĕн федерацин Атăлçи округĕнчи полномочиллĕ представителĕ

Михаил БАБИЧ.

***

Календарĕн юлашки страницине хупмалли, паллă пулăмсене, тунă çитĕнÿсене аса илмелли, малашлăха илсе каякан çулсене тепĕр хут хакламалли вăхăт çитрĕ. Яваплăха туйса çакна палăртасшăн: эпир тăрăшса ĕçленĕрен пире нимĕнле кризис та ура хураймĕ. Çĕнĕ йышши сывлăх сыхлавĕ, паха вĕрентÿ тата ытти нумай тĕллев пĕр тĕвве çыхăнса пурнăçа кĕрсе пычĕç: ФАПсем, спорт комплексĕсем, шкулсем, культура учрежденийĕсем çĕкленсе хута кайрĕç.

Тăван республикăмăрти халăха Çĕнĕ çулпа тата Раштавпа чун-чĕререн саламлатăп. Çирĕп сывлăх, ăнăçупа ăнтăлу, вăй-хăват, тăнăçлăх сунатăп.

Чăваш Республикин Патшалăх Канашĕн Председателĕ

Юрий ПОПОВ.